شاي ولا كابتشينو؟

[heba]

أحب ان أعرفكم بنفسي , انا الأستاذ" مفروس منحوس "المفكر الكبير و العليم ببواطن الأمور , طبعا سوف تندهشوا من إسمي و لكن ده طبعا مجرد إسم لا يعبر عن صاحبه حيث إني مش مفروس ولا حاجه فالدنيا ربيع و الجو بديع اما عن " منحوس " فده لقب العائلة ورثته من جدي الأكبر " منحوس باشا" حيث إنه دائما صاحب حظ في كل حاجة كبيرة ولا صغيرة والصفات دي كلها حتظهر في مقالاتي إللي مافيش زيها .
أحب أن أتكلم معكم شوية عن موضوع بسمع عنه كتير من بعض الناس" الطماعين" إللى مش بعترفوا بإنجازات الحكومة الفريدة :آل في مشكلة إسمها " إرتفاع الأسعار" بذمتكوا في حاجة أسعارها مرتفعة؟؟؟؟ ماهي كل حاجة موجودة بأقل الأسعار, يمكن المشكلة دي موجودة في بلاد بره لكن مش عندنا فنحن احفاد أبو الهول و حتشبسوت و صديقاتها و أصحابها من الفراعنة . فليه الناس بتفتري على الحكومة و زعلانه منها ؟, المفروض أنها تفكر شوية لو هي مكانها حتعمل إيه؟؟؟؟
و بعدين فيها إيه مثلا توفر شوية في الأكل بدل متاكل كل يوم وجبتين متاكل وجبة واحدة يوميا ووجبتين في الويك إند و بدل متشرب شاي "لزوم حرقة الدم" ممكن تقف شوية في الشارع و تشم بنزين و عادم العربيات و كله بيوفر " تخيلوا ممكن نوفر أد إيه من بند الأكل و شرب الشاي؟"
أنا شايف أن الموضوع كبيير و ممكن يحل أزمة عشان كده حابب اعرف وجهة نظركوا " نشرب شاي ولا كابتشينوا؟؟؟؟؟